Nuk ka dyshim se në rrënojat e qyteteve dhe fshatrave palestineze po lind një brez i ri rinie plot urrejtje kundër kolonizatorit dhe shtypësit të Izraelit. Ata do të jenë rekrutët e rinj të Hamasit.
Mund të jetë një tronditje për shumë njerëz, por çdo ditë që kalon që nga 7 tetori kur Hamasi filloi një sulm brutal në Izrael duke vrarë 1200 njerëz dhe duke rrëmbyer mbi 200 civilë izraelitë konfirmon se Hamasi po e fiton këtë luftë politikisht. Organizata, e cila është në listën e organizatave terroriste në BE dhe SHBA, pohon veten si përfaqësuesja e vetme e palestinezëve dhe si bashkëbiseduesja e vetme për bisedimet e ardhshme në procesin e paqes, të cilat në mënyrë të pashmangshme, një ditë, do të kthehen në rendin e ditës së agjendës ndërkombëtare.
Mbështetja për sulmin e Izraelit në Gaza pas 7 tetorit u perceptua nga publiku perëndimor si një përgjigje e pranueshme pas sulmit nga Hamasi. Por shpejt u bë e qartë se edhe Izraeli po e trajton popullsinë palestineze në mënyrë mizore dhe çnjerëzore.
Krahu politik i Hamasit është tashmë i vetmi bashkëbisedues për armëpushimin humanitar dhe negociatat për lirimin e pengjeve. Hamasi po fiton çdo ditë popullaritet. Ka shumë shembuj në botë kur ish-terroristët kanë ardhur në pushtet - Algjeria, Irlanda, Afrika e Jugut…
Një sondazh i opinionit publik midis palestinezëve i publikuar më 13 dhjetor nga agjencia AP tregon një rritje të mbështetjes për Hamasin. Në të njëjtën kohë, ajo tregon se pothuajse 90 për qind e të anketuarve janë kundër Mahmoud Abbas, presidentit të Organizatës për Çlirimin e Palestinës, të mbështetur nga Perëndimi. Palestinezët mbështesin Hamasin si një lëvizje rezistence kundër okupatorit izraelit.
Ndryshimi i perceptimit perëndimor
Ndryshimi i perceptimit të Evropës në këtë konflikt prej dekadash, i cili filloi në vitin 1948, në të cilin Izraeli kishte mbështetjen 100% të qeverive perëndimore, mund të vërehet në momentin e vizitës më 24 nëntor të kryeministrit spanjoll Pedro Sanchez, kryesuesi aktual i BE-së dhe i kryeministrit belg Alexandre De Croix, kryesues i BE-së nga 1 janari 2024.
Të dy u nxitën nga mbështetja në rritje e qytetarëve të tyre për palestinezët, të ekspozuar ndaj bombardimeve të vazhdueshme dhe joselektive nga ushtria izraelite. Video regjistrimet që parakalojnë pa ndërprerje në media dhe rrjete sociale po bëhen të padurueshme për qytetarët europianë. Përpjekjet e disa qeverive të BE-së për të ndaluar protestat pro Palestinës kanë dështuar.
Pikërisht kjo kthesë apo ndryshim perceptimi u reflektua edhe në votimin për një Rezolutë të Asamblesë së Përgjithshme të Kombeve të Bashkuara që bënte thirrje për një "armëpushim urgjent humanitar". Në tetor, 121 shtete votuan për një armëpushim. Në dhjetor, ishin 153. Shtetet e Bashkuara ishin i vetmi vend kryesor që votoi kundër armëpushimit, ashtu si edhe Izraeli. Mbështetja për Izraelin në BE po fillon të zbehet seriozisht dhe Izraeli rrezikon të humbasë mbështetjen ndërkombëtare.
Reçetë për jo stabilitet
Nga 7 tetori e deri më sot, më shumë se 18 mijë civilë janë vrarë në Palestinë, më shumë se gjysma e të cilëve janë fëmijë dhe gra. Për më shumë se dy muaj, bombat e Izraelit kanë vrarë civilë, të moshuar, të sëmurë, gra, fëmijë. Spitale të shembur, shkolla, mjekë pa ilaçe dhe mjete për t'u kujdesur për të plagosurit, amputime pa anestezi dhe tmerr i paimagjinueshëm që raportojnë mediat çdo ditë. Në Gaza janë hedhur mbi 40.000 tonë eksploziv.
Nuk ka dyshim se në rrënojat e qyteteve dhe fshatrave palestineze po lind një brez i ri i të rinjve plot urrejtje kundër kolonizatorit dhe shtypësit Izraelit. Ata do të jenë rekrutët e rinj të Hamasit. Qëllimi i shpallur i Izraelit për të çrrënjosur Hamasin është në kontrast të plotë me realitetin me të cilin përballet toka në Gaza.
Burimi: pixabay.com
Sipas H.A. Hellier i Carnegie Endowment në Uashington, konflikti rrezikon të krijojë versionin "Hamas 2.0" ose ndoshta "më keq, një grup tjetër që nuk e kemi parë ende", por nuk mund të parandalojë radikalizimin, tha ai për NBC.
"Do të radikalizoni më shumë njerëz," i tha NBC-së Hanan Ashrawi, një politikane dhe negociator palestinez. “Kjo jo vetëm që do të rrisë traumën, por do të rrisë edhe dëshirën për hakmarrje”.
BE-ja dhe OKB-ja kërkojnë që Izraeli të respektojë të drejtën ndërkombëtare
Sipas raportueses së OKB-së për Palestinën, Francesca Albanese, lufta në Gaza rrezikon të bëhet "rasti më i madh i spastrimit etnik" në historinë e Lindjes së Mesme. Volker Turk, Komisioneri i Lartë i OKB-së për të Drejtat e Njeriut, tha më 8 nëntor se "ndëshkimi kolektiv i civilëve palestinezë nga ana e Izraelit është po aq krim lufte sa edhe evakuimi i paligjshëm me forcë i civilëve". Ai shtoi se Hamasi kreu gjithashtu krime lufte.
De Cro dhe Sanchez i kërkuan kryeministrit të Izraelit të respektojë ligjin ndërkombëtar, të mbrojë civilët dhe të lejojë një armëpushim humanitar. Kryeministri Benjamin Netanyahu dhe qeveria e tij e ekstremit të djathtë u përpoqën përballë de Cro dhe Sanchez të krahasojnë aksionin në Gaza me veprimet e Shteteve të Bashkuara dhe Britanisë së Madhe kundër nazistëve në Luftën e Dytë Botërore.
“Në Evropë, pas tmerrit të Luftës së Dytë Botërore, ka ndodhur pajtimi dhe rindërtimi. Kjo duhet të ndodhë edhe këtu, duhet të ketë armëpushim”, tha De Cro pas takimeve në Izrael. Dhe ai shtoi se kjo kërkon kurajo politike.
Edhe kreu i diplomacisë së BE-së Josep Borrell, iu bashkua kritikave duke deklaruar se shkatërrimi i qyteteve në Gaza është ndoshta më i madh se ai i qyteteve gjermane në fund të Luftës së Dytë Botërore.
BE-ja është seriozisht e shqetësuar për paratë që Knesset (Parlamenti i Izraelit) ka miratuar për ndërtimin e vendbanimeve për kolonët izraelitë në Bregun Perëndimor. Në reagimin e saj, BE kundërshton vendosjen e "kolonëve ekstremistë në Bregun Perëndimor të pushtuar".
“BE-ja përsërit kundërshtimin e saj ndaj politikave dhe aktiviteteve të Izraelit për vendbanime, duke përfshirë dhe rreth Jeruzalemit Lindor. Miratimi i këtij buxheti shtesë vjen në kuadrin e rritjes së dhunës ndaj palestinezëve nga kolonët ekstremistë në Bregun Perëndimor të pushtuar, e cila ka arritur nivele të paprecedentë. Që nga sulmet terroriste të Hamasit kundër Izraelit më 7 tetor, dhuna e kolonëve është rritur në mënyrë dramatike me rreth 1000 palestinezë që janë detyruar të largohen nga shtëpitë e tyre”, thuhet në reagimin e BE-së.
Kujtojmë se gjatë javëve të para të aksionit ushtarak izraelit në Gaza, Izraeli kishte mbështetjen e plotë të BE-së. Ursula von der Leyen dhe Roberta Mezzola, presidente të Komisionit Evropian dhe Parlamentit Evropian, vizituan Netanyahun dhe miratuan bombardimin e Gazës.
Biden: Lufta e Dytë Botërore nuk duhet të përsëritet
Pas mbështetjes së palëkundur amerikane për Izraelin, Biden tregoi se ende ekziston një problem. Ai tha se Netanyahu duhet "të ndryshojë këtë qeveri që po ia vështirëson shumë detyrën". Në të cilën e djathta ekstreme e Itamar Ben-Gvir (ministri i Sigurisë Kombëtare) merr pjesë në këtë "qeveri më konservatore në historinë e Izraelit", siç tha Biden.
Më pas ai shtoi se Ben-Gvir dhe ata që e rrethojnë nuk duan një zgjidhje me dy shtete. “Ne nuk mund t’i themi jo një shteti palestinez”, shtoi Biden. Bashkësia ndërkombëtare qëndron prapa zgjidhjes për dy shtete, një shtet izraelit dhe një shtet palestinez, por Izraeli e refuzon haptazi një zgjidhje të tillë dhe në mënyrë diskrete kërkon nga Shtetet e Bashkuara që të mos bëjnë deklarata në atë drejtim.
Lidhur me vrasjen e civilëve, Biden shtoi se Netanyahu i vuri në dukje se Gjermania u bombardua në Luftën e Dytë Botërore dhe shumë civilë vdiqën. “Po, kjo është arsyeja pse të gjitha këto institucione u krijuan pas Luftës së Dytë Botërore për t'u siguruar që nuk do të përsëritet më. Le të mos përsëritet më“, deklaroi Biden. Dhe ai i dërgoi këshilla Izraelit: "Mos bëni të njëjtat gabime që bëmë pas 11 shtatorit. Pas 11 shtatorit nuk kishte asnjë arsye për të shkuar në luftë në Afganistan. Nuk kishte asnjë arsye për të bërë disa nga gjërat që ne bëmë.”
Mbështetja e SHBA-së dhe BE-së për Izraelin do të vazhdojë, por rreziku i një ndarjeje të thellë të shoqërive perëndimore për këtë çështje është i madh dhe kërkon një ekuilibër delikat politik.
Siç ka kujtuar këto ditë gazeta spanjolle “El Pais”, nuk duhet harruar se aparteidi në Afrikën e Jugut ra sepse u bë i padurueshëm për opinionin publik botëror. Nuk duhet harruar gjithashtu se Nelson Mandela ishte gjithashtu një terrorist për Shtetet e Bashkuara. Mandela ishte themeluesi i MK, krahu i armatosur i partisë politike ANC. Në korrik të vitit 2008, presidenti Xhorxh W. Bush e hoqi emrin e tij nga kjo listë.
Ju lutemi lexoni rregullat para se të komentoni ose shkarkoni Vini re: Pikëpamjet dhe qëndrimet e shprehura në këtë artikull janë të autorit dhe nuk pasqyrojnë domosdoshmërisht pikëpamjet e Institutit për Studime të Komunikimit ose donatorit.
