Çfarë do të jetë përfundimi i debatit të brendshëm në BDI: funksionimi i grupit të Mexhitit si fraksion partiak apo formimi i një subjekti të ri politik, i cili do të menaxhohet nga ish-kryetari i Çairit?
Bashkimi Demokratik për Integrim, një parti politike e shqiptarëve në Maqedoninë e Veriut, e formuar në maj të vitit 2002, pas përfundimit të konfliktit ushtarak në vitin 2001 dhe arritjes së Marrëveshjes së Ohrit, ishte deri vonë ajo që nënkupton emri i saj - një parti e bashkuar. Në këtë parti kishte mosmarrëveshje të brendshme, por jo edhe përçarje! Mirëpo në BDI, që para Vitit të Ri, si asnjëherë më parë, është bërë një betejë e ashpër për afrimin e anëtarësisë dhe për të dëshmuar legjitimitetin e partisë.
Beteja po zhvillohet edhe në terren, duke zhvilluar takime me qytetarë dhe media. Tashmë janë konsoliduar dy rryma politike, njëra e udhëhequr nga Ali Ahmeti dhe tjetra nga Izet Mexhiti.
Përçarjet - pjesë e historisë politike
Proceset e përçarjeve të brendshme partiake filluan në partinë e parë politike të shqiptarëve, Partinë për Prosperitet Demokratik (PPD), e formuar më 16 prill 1990 në fshatin Xhepçishtë të rajonit të Tetovës, kryetar i së cilës ishte zgjedhur Nevzat Halili.
PPD-ja, e cila në programin e saj ishte deklaruar si parti qytetare, nga shqiptarët ishte perceptuar si një lëvizje politike etnike. Goditjen e parë të shkatërrimit, kjo parti e përjetoi nga një media shtetërore në Tiranë. Ishte komenti i Agjencisë Telegrafike Shqiptare (ATSH), i publikuar në dhjetor të vitit 1993, i cili la të kuptohej dhe në njëfarë mënyre vulosi ndarjen e kësaj partie. Në këtë koment, një pjesë e kryesisë së PPD-së ishte akuzuar për pengim të jetës demokratike në këtë parti, por edhe për konfuzion për, siç i kanë quajtur, kërkesat për drejtësi të shqiptarëve. Pas këtij komenti, partia ishte ndarë në dy grupe ose fraksione.
Nga njëra anë ishte partia “zyrtare” e drejtuar nga Xheladin Murati dhe nga ana tjetër fraksioni i quajtur Partia për Prosperitet Demokratik të Shqiptarëve, i drejtuar nga Arben Xhaferi, një intelektual dhe gazetar i shquar, i cili jetën e tij të punës e kaloi jashtë politikës në Prishtinë.
Një proces identik ka ndodhur edhe në Partinë Demokratike të Shqiptarëve, e formuar në vitin 1994, nga e cila lindi partia e Imer Selmanit, Demokracia e Re dhe Lëvizja për Reforma - PDSH e Ziadin Selës, e cila më pas u quajt Aleanca e Shqiptarëve dhe e cila sot udhëhiqet nga kryetari i Gostivarit, Arben Taravari. Në mënyrë indirekte, lindi edhe partia e Rufi Osmanit, Rilindja Kombëtare Demokratike, pikërisht nga PDSH-ja.
Në dy dekadat e fundit vetëm BDI-ja ishte parti në të cilën kishte unitet. Por nuk është më kështu! Dy grupe të mëdha politike tashmë janë profilizuar në BDI. Në njërën anë janë ahmetistët, siç quhen më dyshja Ahmeti - Artan Grubi, dhe dhe në anën tjetër janë "Zjarrmorët" me Izet Mexhitin dhe Musa Xhaferin. Për herë të parë në historinë e kësaj partie politike po priten trazira të mëdha dhe serioze, të cilat mund ta prekin edhe më shumë në të ardhmen.
Burimi: dw.mk
BDI është përballur edhe më herët me “goditje të brendshme”, por ato nuk kanë qenë aq të forta sa të mendohet se BDI nuk është imune ndaj përçarjes. Pas dorëheqjes së nënkryetarit të Kuvendit, Hisni Shaqiri nga funksionet partiake dhe legjislative në vitin 2005, pas dhjetë vitesh ndodhi lëkundja e dytë në BDI. Në tetor të vitit 2015, ish-shefi i shtabit të UÇK-së (Ushtrisë Çlirimtare Kombëtare) Gëzim Ostreni, deputeti Zulfi Adili dhe disa ish-zyrtarë të tjerë të BDI-së zyrtarizuan partinë e re Uniteti, e cila angazhohej për ndërtimin e besimit ndëretnik dhe krijimin e një shteti qytetar. Mirëpo, kjo parti nuk pati sukses në zgjedhjet parlamentare dhe pas vetëm dy vitesh u shua.
Mexhiti kërkon zëvendësimin e Grubit, Ahmeti nuk pranon
Edhe pse në fund të vitit të kaluar, lideri i BDI-së, Ali Ahmeti, premtoi se do të hapë diskutim në organet e partisë për rezultatet e arritura nga ministrat e BDI-së në qeverinë e Zoran Zaev dhe Dimitar Kovaçevskit, ai këtë nuk e mundësoi. Si reagim ndaj veshit të shurdhër të Ali Ahmetit, lideri i “Grupit të Zjarrit” në BDI, Izet Mexhiti, ka kritikuar publikisht para mediave ministrat e partisë së tij, veçanërisht zëvendëskryeministrin e parë, Artan Grubin. Sipas analizës së përgatitur nga “zjarrmorët”, nga premtimet zgjedhore të BDI-së që u bënë pjesë e programit të qeverisë, nga 170 projekte, vetëm dy janë realizuar plotësisht, kurse pesë janë realizuar pjesërisht.
Në përqindje, vetëm dy për qind e projekteve janë kryer. Mexhiti është një politikan i rrallë, i cili për Ahmetin thotë se “nëse është një lider, kjo nuk do të thotë se është pa mëkat”. Nënkryetari i BDI-së i ka thënë drejtpërdrejt Ahmetit: “Mos e digj jorganin për një plesht“, gjegjësisht ka kërkuar largimin e Grubit nga posti i zëvendëskryeministrit të parë. Edhe pse Grubi në Çair shprehu gatishmërinë e dorëheqjes nëse e kërkon Ahmeti, sepse siç sqaroi ai - fjala e liderit për të është e fundit, lideri i BDI-së nuk e jep Grubin. Ahmeti tha në Gostivar se nuk do ta zëvendësojë zëvendëskryeministrin Grubi, sepse zgjedhja e tij është vendim i shumicës së organeve partiake.
Ndërkohë, Mexhiti dhe grupi i tij nuk insistojnë më në zëvendësimin e Grubit dhe është i vendosur që ai të mos votojë për qeverinë e re dhe veç tij, supozohet se deputetët e tij të një mendjeje, Merita Koxhaxhiku dhe Kastriot Rexhepi, nuk do të votojnë gjithashtu.
“Koalicioni i Zjarrit” përballë “Së bashku për Evropën”
Trazirat e brendshme në BDI dhe vendimi i Aleancës së Shqiptarëve për të qenë pjesë e Qeverisë së Kovaçevskit mund të ketë një rezultat përfundimtar: formimin e një blloku të ri shqiptar, në të cilin do të anëtarësoheshin “zjarrmorët” nga BDI-ja, si fraksion, d.m.th. një grup politik joformal apo si parti e re politike, pastaj BESA dhe Alternativa.
Deri dje, ish-rivalët e ashpër politikë, BESA dhe Alternativa, të cilat deri në shkurt të vitit 2019 ishin bashkë në një subjekt partiak, paralajmërojnë bashkëpunim në të ardhmen. Nënkryetari i BESA-s, Arianit Hoxha dhe lideri i Alternativës, Afrim Gashi, nuk kanë përjashtuar mundësinë e koalicionit. Siç ka raportuar TV Alsat më 25 shkurt 2023, “Liderët e Alternativës dhe BESA-s, përveç sinjaleve të bashkëpunimit të ndërsjellë, kanë zhvilluar takime edhe me krerët e “Grupit të Zjarrit” nga BDI. Nëse anëtarët e këtij grupi përjashtohen ose nëse ata vetë largohen nga BDI, atëherë nuk përjashtohet mundësia e krijimit të një fronti opozitar mes tri grupeve politike në zgjedhjet e ardhshme parlamentare”.
Ky front politik është i mundur edhe për shkak të raporteve personale të njërit prej liderëve të “Grupit të Zjarrit” Musa Xhaferi, ish-zëvendëskryeministër me nënkryetarin e BESA-së, Fatmir Limanin, ish-zëvendësdrejtor i ELEM-it, i propozuar nga BDI-ja, dhe veçanërisht si antipodi i koalicionit të ri qeveritar. Në zgjedhjet e ardhshme, pavarësisht nëse do të jenë të parakohshme apo të rregullta, ata do të konkurrojnë me BDI-në dhe Aleancën e Shqiptarëve, të cilët, siç është përfolur tashmë, do të marrin pjesë në zgjedhje në koalicion parazgjedhor, së bashku me LSDM-në, nën sloganin "Së bashku për Evropën".
Një koalicion pro-evropian me LSDM-në është i mundshëm, por BDI dhe Aleanca e Shqiptarëve, si subjekte të veçanta, nuk do të vendosin të veprojnë si koalicion reciprok. Dy partitë në vazhdimësi që nga viti 2015 kanë sulmuar dhe akuzuar njëra-tjetrën thuajse çdo ditë, gjë që është dëshmi se votuesit e vendosur partiakë të të dyja partive do ta kishin të vështirë të votonin për koalicionin e udhëhequr nga Ahmeti dhe Taravari.
Nga e gjithë kjo del përfundimi se nga marsi i këtij viti në bllokun shqiptar do të funksionojnë dy blloqe. BDI-ja dhe Aleanca e Shqiptarëve, të cilët si ish-rivalë të ashpër do ta kishin të vështirë të vendosnin për formimin e koalicionit dypartiak shqiptar dhe për “qëllime të larta evropiane” do të pranonin koalicion parazgjedhor me LSDM-në dhe në anën tjetër është “Grupi i Zjarrit” i BDI-së.
Për faktin se “zjarrmorët” nuk e kanë përkrahur qeverinë e Kovaçevskit dhe ndaj saj, sidomos ndaj ministrave të BDI-së, duke synuar Grubin, kanë kritika të mëdha, e nga ana tjetër, BESA dhe Alternativa janë përjashtuar nga qeveria, e para që drejtohej nga Zoran Zaev, dhe e dyta nga Kovaçevski, është shumë racionale të parashikohet se një koalicion i trefishtë në bllokun shqiptar është i mundur.
Për shkak të qëndrimit kritik ndaj pushtetit, supozimet janë se “zjarrmorët” së bashku me “besatarët” dhe “alternativët” do të pranonin të ishin pjesë e qeverisë, e cila do të udhëhiqej nga VMRO-DPMNE, nëse partia e Mickovskit merr një numër më të madh deputetësh në zgjedhjet e ardhshme. Por nëse diktojnë konstelacionet politike, respektivisht numrat e deputetëve në Kuvend, do të pranonin koalicion edhe me LSDM-në.
Ju lutemi lexoni rregullat para se të komentoni ose shkarkoni Vini re: Pikëpamjet dhe qëndrimet e shprehura në këtë artikull janë të autorit dhe nuk pasqyrojnë domosdoshmërisht pikëpamjet e Institutit për Studime të Komunikimit ose donatorit.
