Ставови и искуства на специјалните едукатори и рехабилитатори за интеграцијата на медиумите во едукативниот процес

Марија Давчевска, Дејан Филиповски

Апстракт

Во современото образовно опкружување, медиумите играат сè позначајна улога во поддршката на учениците со попреченост, особено преку зголеме­на комуникација, мотивација и социјална инклузија. Истражувањето има за цел да ги испита ставовите и искуствата на специјалните едукатори и рехабили­татори во Република Северна Македонија во однос на употребата на медиуми во нивната професионална пракса. Применета е методологија која вклучува кван­титативна анкета со 56 учесници и квалитативни полуструктурирани интервјуа. Истражувањето се фокусира на перцепираните придобивки од медиумите, чес­тотата и видот на нивна примена, како и на бариерите со кои се соочуваат струч­ните лица, како технолошки ограничувања, недостаток на адаптирани содржини и недоволна обука. Резултатите покажуваат дека медиумите генерално се пер­ципираат како корисна алатка, особено во контекст на визуелна поддршка и му­лтисензорно учење. Меѓутоа, присутни се значајни разлики во нивната примена, зависно од нивото на дигитална писменост, типот на попреченост со која работат, како и од институционалната поддршка. Дополнително, евидентирани се разли­ки во пристапот кон користење медиуми меѓу урбани и рурални средини, како и кај различни генерациски групи на стручни лица. Интервјуата откриваат раз­лични адаптациски стратегии и креативни пристапи за интеграција на медиумите, вклучувајќи употреба на визуелни потсетници, аудитивни ресурси и интерактивни апликации. Истражувањето има импликации за унапредување на обуката, развој на локализирани ресурси и системска поддршка за дигитална инклузија во спе­цијалната едукација. Особено се препорачува развој на сеопфатни програми за дигитална писменост, редовна техничка поддршка, како и вклучување на меди­умите во националните стратегии за инклузивно образование. Наодите отвораат простор за идни истражувања кои ќе го разгледуваат долгорочното влијание на медиумите врз академскиот и социјалниот развој на учениците со попреченост.

Клучни зборови: Специјален едукатор, медиуми, дигитална писменост